الاعضاء19,352

الكومنتات 25,958

المشاكل 31,045

انضم الان: اخر الاحصائيات

انا كنت بحب واحده معايا ف الكليه وف نفس دفعتى .. بس هو فى فرق بينا ف الجسم صغير…

‫انا كنت بحب واحده معايا ف الكليه وف نفس دفعتى .. بس هو فى فرق بينا ف الجسم صغير مش كبير .. هو اللى يشوفنا يقول أنها أكبر منى مش قدى .. المهم هو انا الموضوع مش فارق معايا خالص ولا مأثر فيا أصلا وكأن كلامهم صفر ع الشمال .. وانا روحت أتقدمتلها فعلا وأهلها وافقوا بس أهلى ف البيت مش موافقين وضغوط عليا كتير منهم أن الجواز من نفس السن مش كويس ومش بيدوم والمفروض ان يبقى فى فرق سن ع الاقل 5 سنين وكده يعنى انا بصراحه ضعفت قدام كلامهم ده وبدأت مش أهتم بيها وهي بدأت تزعل منى مع العلم انى عمرى ما كنت أتمنى أشوف دموعها ولا أسمح لنفسي حتى أنى أزعلها وكنت بتأسفلها لو أى حد تانى غيرى زعلها -زى عندهم ف البيت مثلا – وده لأنى بحس بالعجز لأنى مش عارف أخليها مش تزعل ولا حد يزعلها .. المهم بعد عدم الاهتمام وشوية كلام مش كويس ويجرح كرمتنا أحنا الاتنين سيبنا بعض بس للأسف انا مش قادر أبعد عنها وكلمتها عشان نرجع تانى بس هى بتقول ان الوقت خلاص فات وأتعودت على عدم وجودى وممكن نبقى أصحاب لكن مش ممكن نبقى حاجه تانيه ولكن بعد كلام كتير أتفقنا ع أستخاره منى انا ولما صليت أرتحت جدا ويمكن حسيت انى بحبها أكتر من الاول وقولتها انى بحبها بس للاسف انا مش حاسس منها بأى مشاعر كانت موجوده قبل كده ... قولولى أعمل أيه ومن غير تريقه الله يرضى عنكم‬

انا ولد في 2 ثانوي بابا متوفي من وانا عندي 7 سنين ومعنديش اخوات والحجه ربنا يبار…

‫انا ولد في 2 ثانوي بابا متوفي من وانا عندي 7 سنين ومعنديش اخوات والحجه ربنا يبارك فيها اللي مربياني ومستحملاني وشوية التفاصيل دي خلت شخصيتي هاديه كده واللي بيشوفني بيقول عليا غلبان وطيب يعني وده كان في نسبة من الانطوائية في شخصيتي لحد من 8 شهور تقريبا لما طلعلي حب شباب وبعدين انتشر في وشي بطريقة كبيرة شوية وده اللي خلاني انطوائي بشكل كامل مش بهزر واتكلم غير مع صحابي القريبين مني بس حتي مش صحابي كلهم بقيت عايز اقعد في البيت ومخرجش ومش عايز اقابل حد او اتعرف علي حد جديد مع اني كنت غير كده خالص قبل ما يطلعلي حب الشباب وابقي بالشكل ده كنت بحب الخروج والهزار والجنان بس بردو في حدود الناس اللي اعرفها بس مفيش مشكلة اتعرف واهزر مع ناس جديده لسه عارفها .. ياريت حد يفيدني بس ازاي اتغلب علي شخصيتي الانطوائية دي اللي حصلت بعد ماجالي المرض ده وخصوصا ان احنا في مصر وكل اللي يشوفك يقولك بطل اللي انت بتعمله ...الخ “الشباب هيفهمني ” بس كنت عايز حد يديني شوية نصايح اخرج من الشخصية دي
وياريت لو حد يعرف دكتور جلدية كويس في اسكندرية عشان انا روحت لاكتر دكتور في منطقتي بس محدش جاب نتيجة معايا ! واسف اني طولت‬

انا عندي 21 سنه بحب واحده بقالي 6 سنين وهي حبتني من 4 سنين كنت كل يوم بشوفها وبن…

‫انا عندي 21 سنه
بحب واحده بقالي 6 سنين وهي حبتني من 4 سنين
كنت كل يوم بشوفها وبنقعد مع بعض وعمتها عرفت ان انا وهي بنحب بعض وقرايبها كلهم عرفوا – ودي كانت حاجه حلوه جدا وفرحت لما اهلها عرفوا عشان مانبقاش بنحب بعض من ورا الناس ومن ورا اهلها
كنت ف صلاتي وف اي حاجه وطول النهار بقعد ادعي ربنا انها تبقا من نصيبي لاي دي حاجه كان نفسي فيها من 6 سنين وجاتلي ومش ممكن اجي ف يوم واسيبها او افرط فيها وكل ما اروح اتقدم امها تقولها لو دا اخر واحد ف الدنيا مش هاتتجوزيه _ عشان شافتني انا وهي واقفين مع بعض وقولت لعمتها وجدتها وبرضو مافيش فايده
لحد ماجه ابوها ربنا يسامحه وفشخني وجوزها من 3 شهور لواحد تاني غضب عنها بعد ما ضربها
وانا بصراحه مش عارف اوصف حالتي كل يوم بالليل بقعد افكر انها دلوقتي قاعده مع واحد غيري وعايشه مع واحد غيري وانام معيط
ودلوقتي حياتي كلها عياط ونوم ومخدرات‬

كنت نزلت مشكلتى هنا قبل كدا ان الانسان اللى مرتبطة بية ظلمنى واتهمنى ظلم وفى واح…

‫كنت نزلت مشكلتى هنا قبل كدا ان الانسان اللى مرتبطة بية ظلمنى واتهمنى ظلم وفى واحد صاحبة وقع بينا جامد وهو اتسرع واهنى اوى وجرحنى بالكلام وبعدين جة اعتزر ليا على كل دة وقالى انا اسف وغلط فى حققك وانا ندمان انى ظلمتك بس ساعه شيطان وكلمة اسف دى شوية ومش عارف اعتزر ازاى وانة عرف صاحبة على حقيقتة وانة محتاجنى جمبو وان كلنا بنغلط وعاوزنى اسمحة بس هو جة على كرامتى جدا ساعة المشلكة وانا من جوايا مش عارفة اسامحة وفى نفس الوقت عاوزة اسمحة وخايفة هو انسان كويس جدا ومحترم بس اول مرة اشوفة فى الحالة دى والمشكلة دى بقالها شهر ونص ومش راضى يبعد وعمالة اقولة كلام وحش اوى وانى مبقتش بحبة وانى بكرهة بس برضوا مش راضى يبعد يسكت يومين ويتكلم تانى ويتاسف ومش راضى ينهى الموضوع وقالى ان ربنا عاقبة لانة ظلمنى وجة عليا ومش عارفة اعمل اية بجد ياريت تنصحونى انا زى اختكم ؟‬

من غير تريقه انا بحب واحدة جدا وهى بتموت فيا بس بعد فترة اكتشفت ان عندها كذا مرض…

‫من غير تريقه انا بحب واحدة جدا وهى بتموت فيا بس بعد فترة اكتشفت ان عندها كذا مرض هايستمر معاها بعد كدا ايه رايكم اسيبها ولا اكمل عادى‬

انا مشكلتي ان انا بس اللي فاهماني انا مخطوبه لابن عمي مش قصه حب ولا حاجه احنا تق…

‫انا مشكلتي ان انا بس اللي فاهماني انا مخطوبه لابن عمي مش قصه حب ولا حاجه احنا تقريبا متربين مع بعض هو اتقدملي واستخرت وحصل نصيب المهم انا ليا 4 شهور مخطوباله المشكله اني كنت قبل الخطوبه برسم لنفسي خيلات وطموحات مع البني ادم اللي هتخطبله مش لاقيها معاه دلوقتي مش متفاهمين خالص رغم طيبته معايا بس بحس ان كلامي بيدخل من ودن ويخرج من التانيه انا مش حاسه منه اي اهتمام ومش عايزه اطلبه .اهتمامه الاول لشغله ولو اتكلمت يقولي شغلي ده هو اللي هيخلني اجمع فلوس علشان الجواز انا بيشغل بالي حاجات ممكن تكون تافها اه بس بالنسبالي بتفرق جدا ولو مجرد كلمه بسيطه ده غير انه اقل حاجه تزعله وممكن يقعد يوم واتنين وتلاته ميسالش فيا لمجرد اني قولت حاجه تزعل من غير قصد بحس انه انا بس اللي مطلوب مني اسال واخاف واقلق واهتم وماليش اي حقوق ف كده بالله عليكم فدوني بس من غير تريقه‬

أنا اتعرّفت على بنت من على النت، وشوفتها ، هي بتحبني جداً جداً، وأنا بصراحة مش ع…

‫أنا اتعرّفت على بنت من على النت، وشوفتها ، هي بتحبني جداً جداً، وأنا بصراحة مش عارف أنا بحبها ولّا لأ!! أنا ما أعرفش أهلها كويس، وأنا من طبعي ما بحبش الخيانة؛ يعني لو حبيتها بجد هاخش من الباب، وهي مؤدبة فعلاً. أنا قلت لها كتير خلينا أصدقاء؛ علشان حاسس إننا مش هنكمّل مع بعض، وأنا مش عايز أجرحها، حاولت أفهمها وألمّح لها إننا ممكن ما يكونش فيه نصيب بنا؛ لأني بجد خايف أجرحها علشان هي حبتني.. أنا بافكر أسيبها، أنا لسه عايز أتقدّم وخايف حد يتقدّم ويكون مناسب وترفضه بسببي، وما أعرفش أتقدّم لها خايف من الموقف ده جداً؛ لأنه هيكون في فكري طول عمري، أرجو الإفادة أسيبها بأسلوب كويس إزاي، مع العلم إني ساعات باحس إني بحبها.

السلام عليكم ورحمة الله وبركاته لو سمحتم بدون تجريح .. ياريت متلوموش لأن محدش ع…

‫السلام عليكم ورحمة الله وبركاته
لو سمحتم بدون تجريح .. ياريت متلوموش لأن محدش عارف بكرة مخبى ايه .. واللى مش بيتاخد بالرضى ممكن يكون بالغصب ...
دى مشكلة واحدة صاحبتى اخواتها وباباها اتوفوا فى حادث و مش باقى ليها غير والدتها بس ربنا يخليهالها ويشفيها بعد الحادثة والدتها اصبحت فى حالة نفسية سيئة و نادراً ما بتتكلم او تخرج من الحالة دى و للاسف صاحبتى دى من زمااان اووى من كتر اللى مرت بيه فى حياتها شخصيتها ضعيفة جدا وساذجة وبتصدق اى حاجة قابلت شخص و تخيلت ان ده تعويض من ربنا ليها و انه هدية تعوضها اللى فات و مفيش اى كلام كان بيقنعها انه شاب زى اى شاب بيدخل حياة اى بنت بالكلام المعسول واللف والدوران .. و مصدقتش و كل يوم كانت بتتعلق بيه اكتر و الولد كان ذكى جدا وشيطاان عرف انها اتعلقت بيه وانها بتتعامل باسلوب مجنون اقل حاجة تتقال اسلوب طفلة و عشان عارف كويس ان مالهاش غير والدتها بس اللى مش دريانة بالدنيا اصلا راح كلم مامتها ودخل عليها بكلام انا جانبكم وانا الراجل اللى ليكم و ينده مامتها بماما و يسال لو ناقصهم حاجة فى البيت اتشعبطت فيه اكتر .. انا قلقت من تعلقها بيه وسالت ع الولد ده واكتشفت انه ماشى مع شلة مش كويسة وكان عارف بنت مشبوهة وسمعتها سيئة وكان بيعمل معاها حاجات مش كويسة و ما خفى كان اعظم و عرفت انى لو روحت قلت لصاحبتى مش هتصدقنى لانها شايفاه الملاك الطاهر وبتصدقه لا وكمان بتخاف منه وبتعمله الف حساب و جبتلها دليل من الناس اللى حكولى بنفسهم وحاجات خصوصية فى حياته هو حكيهالها عشان تتاكد وروحت عشان اقولها بس للاسف كنت اتاخرت اووى و اكتشفت ان الواد ده ضحك عليها وفهمها بكلمتين انها مراته و انه عارف وسال شيخ وان ده جواز و اقنعها انه عمل كده لغاية ما يقنع اهله وللاسف مبقتش بنت ولما حكتلى انا اتصدمت و حكيتلها كل اللى عرفتوا و انهارت و دخلت المستشفى كان عندها صدمة عصبية و انا قلت لوالدتها انها افتكرت باباها واخواتها لان فى حادثة زيها بالظبط وخفت ان اقول حاجة لوالدتها تموت فيها فضلت جانبها و مرت الازمة و قولتلها تطلب منه انه يتقدملها ويتجوزها و متجيبش سيرة و متقولش هى عرفت عنه ايه وقالها انه هيتقدملها فعلا بس والده رافض وهيقنعوا مع الوقت وهى للنهاردة مستنياه 4 سنين فاتوا و هى منتظرة و الاخر هو سافر وقالها بعد سنة هنزل وهتقدملك و كل يوم بتحكيلى كل حاجة و من كلامها حسيت انه بيتلكك و عايز يتهرب منها يسيبها بحجج خايبة و بيكرهها فى عيشتها و بيشك فيها وبيعاملها معاملة زى الزفت وكتير عمل انه بيهزر و قالها انا اصلا لو سيبتك متقدريش تعملى حاجة هتقولى لمين يعنى لانه عارف ان مالهاش قرايب ولا لها حد وحتى والدتها تعبانة و لما قالتله انى انا عارفة اتخانق معاها وقالها انا بحذرك تحكى لاى مخلوق تانى وانا ممكن ارميكى زى الكلبة ولا هتقدرى تعملى حاجة .. دلوقتى اقسم بالله صاحبتى دى شخصية طيبة جدا و طفولية جدا جدا .. انا عارفة انها غلطتها ودمرت مستقبلها و حياتها كلها وحاليا هى داخلة ع 26 سنة و مامتها مقهورة على وضعها اللى كل يوم فى النازل وحالتها النفسية اللى اصبحت تقهر .. ارجوكم تساعدونى نشوفلها حل دى انسانة وحيدة ويتيمة فى الدنيا .. ربنا يعافيكم ويعافينا ياارب .. ياريت حل جذرى ..
قال رسول الله صلى الله عليه وسلم [سباب المسلم فسوق، وقتاله كفر] و لقوله تعالى ( ولا يغتب بعضكم بعضاً أيحب أحدكم أن يأكل لحم أخيه ميتاً فكرهتموه )‬

رساله 13 انا كنت بحب بنت اوى وكنا متفقين انى هتقدملها انا مستوايا متوسط ومن شبر…

‫رساله 13 انا كنت بحب بنت اوى وكنا متفقين انى هتقدملها انا مستوايا متوسط ومن شبرا وهيه عالى من الزمالك المهم خرجنا مع بعض اول مره عزمتها على كشرى اكلت معايا وبعد ما مشيت مكلمتنيش تانى هو انا غلطت فى حاجه‬

رساله 12 جوزى كل يوم ينزل يلعب بلاستيشن مع اصحابه لانه بيحبه جدا لو انا اتعلمت…

‫رساله 12 جوزى كل يوم ينزل يلعب بلاستيشن مع اصحابه لانه بيحبه جدا لو انا اتعلمت عشان الاعبه ومخليهوش ينزل ابقى تافهه ولا عادى‬

إلى الأعلى