السلام عليكم عايزة اسأل سؤال موجه للشباب هوا فعلا الرجالة بعد ما تتجوز ما بتقولش…


السلام عليكم عايزة اسأل سؤال موجه للشباب هوا فعلا الرجالة بعد ما تتجوز ما بتقولش كلام حب زي زمان ولا تقعد تتغزل في مراتتهم ؟؟ جاوبوا بصراحة بليييز
من غير اسم لو سمحتي


Source

25 رأي على “السلام عليكم عايزة اسأل سؤال موجه للشباب هوا فعلا الرجالة بعد ما تتجوز ما بتقولش…”

  1. 😂😂😂😂 يا بنتي بعد الجواز مراته بتتحول لاخته كدة بيحبها ويخاف عليها ويجيبلها اللي هي عاوزاه بس بالاخر وهو معدي يحب يمسي علي قفاها كدة او يشد شعرها يزغزغها لو هي بتكره ده اهو رخامة كدة بس كلام حب ورومانسية ديه بتبقي في المواسم طلعة رجب عاشورا وعيد الثورة كدة يعني 😂😂😂😂

  2. اقولك الصراحه .. لا طبعا هو بيفكر في حاجات تانيه أهم هتتاكلي ايه هتلبسي ايه عيالكوا هيعيشوا ازاي و هيتعلموا ازاي بال1500 جنيه الل بياخدهم فياريت الستات الل تلاقي جوزها كده تحاول تشيل معاه مش تيجي تبعت مشكله هنا و تقول جوزي مبقاش بيحبني

  3. ياحبيبتي من غير ماتحلفينا اجبلك عره الرجاله Hesham Elkhwaja اهو من ارض الواقع دلوقتي مع صحبتي عره النسوان Hęñđ Māhęŕ عمال يحب فيها وجيابلها انسيال هديه انشالله هتموتي مشنوقه بيه الانسيال ده

  4. انا بستغرب اوي لما الاقي راجل عمال يشتكي من مراته ويقول انها قرفاه في عيشته ومنكده عليه ومخليا كل ايامه كئيبة ومفيهاش اي حاجة تبسط لاني انا مقتنع وبشدة ان الراجل هو قائد اي علاقة وهو اساس نجاح او فشل اي مشروع زواج الزوج اللي بيشتكي من زوجته دا بيبقي عامل زي المدرس اللي يشتكي من طالب عنده هو لما بيشتكي الطالب اللي هو مهمته اصلا انه يهذبه ويعلمه دا معناه انه اعتراف صريح من المدرس انه فاشل في اداء وظفته والزوج بردا بيكون كدا طبعا منقدرش نعمم ونعلق فشل اي حياة زوجية علي الزوج دايما اكيد بيبقي في بعض الشواذ عن القاعدة الاعم لكن فعلا انت كراجل تقدر تخلي حياتك وزواجك جنة او تخليها اكبر مشروع فاشل يااخي هو صعب عليك انك كل مدة كدا لما تدخل البيت علي مراتك تجبلها معاك وردة او شكولاتية وتديهالها بابتسامة منك وبوسة ابوية علي جبينها تشكرها فيها علي تعبها في البيت في غيابك تفتكر بعد موقف زي دا ممكن مراتك تكشر في وشك او تنكد عليك ؟ ياتري لما تعد تاكل مع مراتك ولما تخلصو اكل ايه اللي حيحصل لو قمت معاها وشلت الطبق اللي كنت بتاكل فيه ايه اللي حيجرح رجولتك او يقلل من كرامتك لو عملت كدا ؟؟ ايه اللي يمنع وهي واقفة تغسل الاطباق في المطبخ انك تجيب المكنسة الكهرباء وتروح تنضف السجادة اللي تحت السفرة مكان ماكنتو بتكلو هو دا عيب ولا حرام ؟ يااخي دا الرسول الكريم اللي احسن واكرم واعز مني ومنك كان بيساعد اهل بيته وكتير اتشاف وهو بينضف هدومه ويرفيها ويصلح النعل بتاعه ايه اللي يمنع انك بعد ماخلصت اكل وجبتلك الشاي تشربه انك تمسك اديها وتديها بوسة شكر علي الاكل الجميل اللي عملتهولك وتعبها طول اليوم في المطبخ عشان تعملك الاكلة اللي بتحبها؟ هو لو انت لقيت حاجة مش عجباك في الاكل او كانت ناقصة فيه هو لازم تقول رايك بكل غلظة وقلة ذوق هو مينفعش تخلي الحبيب المصطفي قدوة ليك اللي اتقال عنه ماعاب رسول الله طعام قط عمره ماقال دا وحش ودا نقصه ايه لا كل واشكرها علي تعبها ومجهودها وبعد الاكل وانتم قاعدين في هدوء قلها ياه صنية المكرونة دي مكمش ليها حل روووعة دي بس لو كان ملحها قليل شوية كانت حتبقي خرافة دي لو البشاميل بتاعها يتقل المرة الجاية حتبقي ملهاش حل انتقد وقول ملحظتك بس بكياسة وبذوق بلاش الغلظة والغباوة في التعامل الزوجة دي امانة في رقبتك عاملها كانها بنتك اه بنتك بالظبط انصحها وانت بتضحك وازعل منها وانت خايف عليها خليها اسعد واحدة وعيشها في جنة وقتها هي اللي حتخاف علي زعلك وحتخاف انك تزعل منها وانها تخسر الجنة اللي عيشة فيها خليها تخاف علي زعلك عشان انت في مكانة باباها وهي اكيد متحبش تزعله ومتخليهاش تخاف من زعلك كانك وحش بيهددها وافتكر دايما قول سيد الخلق المصطفي عليه السلام مااكرمهن الا كريم وما اهانهن الا لئيم خليك كريم وراعي ربنا في اهل بيتك الضحكة والكلمة الحلوة والفسحة البسيطة مش حيفقروك ولا حيقللو من قيمتك …..

  5. بغض النظر عن انك وجهتى السؤال للشباب 😀
    اغلب الرجالة والستات فى مجتمعنا فيهم عيب خطير اوى الجواز بالنسبه لهم تارجت اول ما بيوصلوا له بيركبوا الوش الخشب الا من رحم ربى 😀
    مع ان ابتسامتك فى وش زوجتك او زوجك هتؤجرى عليها حبك وعطاءك واحترامك لميثاق الزواج هتؤجر عليه
    متخلوش ظروف الحياه تقتل جسور الحب والود اللى اتكونت عشان تاخدوا خطوة الزواج الحياه كلها مطبات عدوا منها سوا واصمدوا وصروا انكم تكملوا وتقدروا على مر الدنيا بحلاوة حبكم متبطلوش تحبوا بعض
    مهم اوى نعرف قبل الزواج ان الزواج بدايه وعهد مش نهاية للوعود والغزل والكلام الحلو دة هو البدايه ربنا يسعد القلوب 🙂

  6. انا متجوز من 15 سنه وديما محسس مراتى انها فى فترة خطوبه ..يعنى اجبلها شوكولاته مره ..مره تانيه حاجه بتحبها ..مش بمشى من البيت من غير ما اسلم عليها ولما اجاى احكلها اللى حصل معايا من اول ما سبتها لاحد ما جئت ..حتى لو حاجات تافهه ..مش لازم كل شويه اقولها بحبك ..بس بعمل حاجات تعنى الكلمه دى ..بس ما يمنعنش اننا بختلف احيانا .وده مش بيطول كتير …انا بتجنب اللى يزعلها وهى بترضينى على اد ما تقدر .. فيه طبعا ضغوط حياة ومصاريف الاولاد ومدارس ..الحياة مش كلها زبادى فى الخلاط ..من ده شويه ومن ده شويه ..والله المستعان

  7. حضرتك معظم إلى هنا سناجل وهيفتوا وانا هفتي معاهم واقولك هتلاقى فنله بحملات وكرش مترين قدام وانتي نفسك هتعصبي راسك باشرب إلى في ورد ده ورحتك بصل هي دي الاسره المصريه السعيده 😂😂

  8. هههههههههه هو مش بالمعني الساذج اللي سائد ده لأ .. الست بطبعها كائن رومانسي بيحب يسمع كلام حلو .. وكان فى حوار قبل كده شوفته فى برنامج امريكي مع “زير نساء” فالمذيع بيقول للراجل يعني ايه سبب ان الستات مهبولة عليك وانت شكلك مش حلو قاله “حلاوتي فى لساني” .. لكن مش معني كده ان الحب بيقل بعض الجواز لأ .. هو ممكن يقل بسبب الإهمال واللامبالاة وغياب المسئولية وعدم مراعاة شعور الطرف الآخر .. لكن الكلام الحلو موجود لأن المسئولية بتكتر والراجل بينشغل انما فى فترة الخطوبة بتكون المسئولية قليلة مش حاسس بأعباء فعلطول الكلام الحلو موجود وممكن يكلمك بالساعات .. لكن بعد الجواز الأمور بتختلف كلياً

  9. اه طبعاااااا دى حقيقة لان اصلا بيبقى عندهم هم بعد الجواز والحمل بيزيد فبيبقى كل تفكيرهم أنه يجيب فلوس ويسد ع البيت اللى بيبقى فاتحه.. مع العلم أن لو وحده ظهرت بحياته غصب عنه بينسى مراته وبينسي ولاده والدنيا بحالهاااا وساعتها بيعرف يقول كلام حلو بس ده طبعهم..👊👊

  10. احنا البنات نرتوي بتلك الكلمات 😂
    لو بس الراجل يعرف ان مراته
    بتتفتح زي الوردة وتفرح و تسعد بكلام الحب ده.. اكيد مش هيبطل ابدااا.. قولها مش هتندم ده انت هتندم لو ماقولتش😂
    يارجال العالم اتحدوا ..وقولوا كلام حب بقه ربنا يهديكو 😂

  11. العامل الاساسي بيبقي عليكي انتي ما انا كا راجل مش هرجع من الشغل اشوفك بجلبية المطبخ وشمطة القشرب علي راسك زي ربطة ستي ومقبلاني بالكبشة ف ايدك وتقوليلي جبت طلبات البيت ولا لا .. و عيزاني اتغزل ،، يعني هيتغزلوا ف ايه حضرتك فجمال الكبشة ولا شمطة القشرب ولا البرفم بتاع جلبية المطبخ وانبي يا حجة سيبي الرجالة فحلها دا تحمدي ربنا انهم مبيطفشوش بعد الجواز اصلا

  12. اهاا الصراحة وده طبيعى انه يقل بس لان الحياة ظروفها ومتطلباتها بتتغير بس مطلوبه احيانا بس اظن ف حاجات ومواقف اهم من كلام يتقال
    على فكرة فى ازواج بيقولو كلام حلو وغرام وهدايا وتلاقيهم مقضينها برا البيت الكلام الحلو الكتير وقتها هينفعك

  13. كلام حب ايه بس بعد الجواز يا لينا … احنا اتغيرنا خالص يا بنتي بصي عشان نبقى على نور من اولها :
    مفيش راجل فيه صفات جراندايزر اللي بتقرأيها وتسمعي عنها دي … ماشي …
    يعني مفيش راجل حنين وطيب وشجاع وكريم متدين وبيصوم النهار وبيقيم الليل وعطوف وشيك وجسمه متناسق ورياضي ومن غير كرش ومصفف شعره دائما وبيمسك سلاحه الآلي في يمناه مقاتلا الاعداء بينما يمرر صوابع يده اليسرى بحنان بين خصلات شعرك الكستنائي المتناثر في الفضاء السرمدي ….
    الكلام ده موجود في الروايات الرومانسية اللي معظم كتابها بيبقوا فاشلين في حياتهم الشخصية … فاهدي كده … هاه … اهدي واعقلي ، وما ترفعيش سقف طموحاتك عشان ما يتهدش على دماغك لما تشوفي الفانلة البيضة أم حمالات 😃😃😃

  14. سلام عليكم
    اولا يافندم دة عقليا ونفسيا طبيعي ازاي بقى؟؟!
    استشعار ان الزوجة او يعني حبيبتي بعيدة عني لسة فدايما اقولها كلام حلو رومانسي نوعا ما عشان تفضل متعلقة بيا
    لما بتتملكها دة طبيعي شوية رومانسي لكن حتة اظهار احسن ما فيا مبقاش محتاجه اوي وهي عارفة كل تفاصيله الكويسة والسيئة
    دخلوا مرحلة تانية لكن الست الذكية والرجل الذكي كمان له مواقف تعتبر احسن من كلام الحب لو عاملها بحب لو اتصرف بذكا ورحمة وود
    وما بين الزوجين اكبر من اي شيء وحسبي الله ونعم الوكيل

  15. غزل ايه وزفت ايه في الزمن المنيل اللي احنا فيه ده كفايا المسئوليات اللي الراجل بيتحملها في سبيل راحه الهانم مراته وظروف الحياه اللي مابترحمش كفايه علي الست أنها تحس بالأمان مع زوجها وأنه يتقي ربنا فيها ويحسن معاشرتها وبالمناسبة الست اللي بتدور علي الكلام الفاضي ده مع رجل تاني بيكون نفس الرجل ده اللي مش فاضي يقول كلمه حلوة لزوجته يعني مش مثالي ولا حاجه بس هو الممنوع مرغوبة للأسف!!

  16. والله بعد الجواز الواحده فيكو تسد النفس .
    تبئا قاعد فى امان الله وتقولك هو مفيش كلمه حلوة انت مقولتليش وحشتينى من زمان يا شيخه ما انتىفى خلقة امى ال24 ساعه .
    ولو دخلت من الباب وقولتلها وحشتينى تقولك اه هى التانيه مخليه مزاجك حلو وتنكد ع امك ياشيخه روحى طلعتى دين امى .
    الكلام الحلو بيتقال بس لما يجى لوحده .
    حبو بعض حبو بعض ياولاد الكلب

  17. لااااا مفيش لا كلام حب ولا رومانسية بعد الجواز احنا بنتجوز وبعدين بنتقلب إلى رجالة نكدية وكده يعنى أوعى تصدقى احسن يضحكوا عليكى
    وانتى كمان بعد ما تخلفى هتبقى ام الخلول وشعرك منعكش وحالتك يا ساتر يارب

  18. خديها قاعدة من استعجل شيئ بالحرام عوقب بحرمانه
    البنات والاولاد بيقولوا كبام الحب وهما لسة مافيش بينهم ارتباط والارتباط هنا مش الخطوبة لا عقد القران هو الارتباط الشرعي.. كل كلام ومشاعر الحب بتستهلكوها قبل الارتباط الشرعي فطبيعي بعد الزواج خلاص بينتهي وماعدش يتقال.. لكن اللي بيمتنع عن اغضاب ربنا وبينتظر الحلال بعد الزواج بيبقي زي العطشان بيغرق اللي معاه بالمشاعر والكلام وهو المطلوب

  19. بكل صراحة مبنقولش كلام حب زي زمان
    عشان زمان كنّا فاضين وعندنا راحة بال ومفيش مسؤليه ومفيش مشاكل ومفيش مشاغل
    بعد الجواز بيبقي كل همنا ان احنا منحرمش مراتتنا من حاجة وبعدين تيجي الاطفال بمتطلباتهم
    فيبتدي الجهد يزيد والتعب يكتر
    والمسؤليه تريد
    عشان مينفعش نقول لطفل مفيش
    مَش هينفع اجيبلك او ظروفي متسمحش
    عشان دا طفل مَش هيقدر يستوعب
    فتبدتي المطحنة
    وبعد كل دا عاوزين كلام حلو
    طيب يجي امتي 🤔🤔🤔
    فهمتي حضرتك بليييييز 🤚🏻

  20. غلبانه… ههههه…. حب ايه يا حاجه… بصي يا بنتي الحقيقية المره الممنوع بسسسس هو ال مرغوب… الحاجه المتاحه ملهاش قيمه… ودا مش معناه ان مفيش حب لا فيه بس من نوع تاني… حب ربنا وماما وبابا… هههه…. من غير هزار لما الراجل بيدفع دم قلبه في الجواز ويمضي قايمه ومؤخر بيقي عنده احساس انو مقيد او مرغم ان يتقبلك بكل عيوبك ال بتبان بعد الجواز وبيكرهك ويكره نفسه وبيكره ال نصحه يتجوز… الحب قبل الجواز احلي لانه مفيهوش قيود ومسؤليات… ودا بيخلي خطيبك بيحس انه بيحبك بجد… الا قليل من البنات ال بتعرف تخلي جوزها يحبها اكتر بعد الجواز بطاعته وحسن معاشرته…

  21. اكيد اللي بيحب بجد الحب هيفضل دااايم
    لكن بيبق فيه اولويات بالنسبالهم اهم من الغزل يعني المصاريف والمعيشه وضغوط الحياه وحملان الهم والعيال وبامبزهم والهم الناقع ده 😂 ف انتي تحاولي تخففي عنه وتاخدي بايده وتبقيلو سند ومتزوديش عليه الحمل ده نوع
    فيه نوع تاني بقي اللي بيفضلو متصنعين ف فتره الخطوبه
    هو يتصنع انه احن مافي مجره درب التبانه وهي تتصنعله انها البت الملاك بير الرومانسيه
    يجو بعد الجواز يظهروا ع حقيقتهم بعد مابيتدبسوا ف بعض بقي
    ف تبتدي المشاكل ويبدأ التغيير ف تحسي انه مأهمل هو مش مأهمل لكن هو اتصنع وطلع كل مشاعره بما فيه الكفايه ف فتره الخطوبه

  22. الحب بعد الزواج بيكون بالفعل اكثر منه بالكلام وكل مرحلة من العمر لها مايلائمها وهكزا الى اخر العمر ان شاء الله وربنا يزيد المحبة في القلب بين كل زوجين دائما يارب العالمين لان الزوجات هن زهور الحياة التي ترى منها المنظر الجميل وتشم منها رائحة المسك او العطر وتفيض بالرقة والحنان على كل من حولها في الاسرة…………………الخ

  23. طول ما هما لسه متجوزوش بيبقي منجذب اوي زي المغناطيسِ
    ◀ …. ▶
    هيموتو ويقربو لبعض🔄 بس بعد الجواز بيطرشئو فبعض
    ⏩⏪
    فبعدين تحصل المسؤوليه
    🍼 ☁💊💉🍝🍜☕🍡📢هات معاك ومسؤوليات تزيد والعجله تلف الجواز مش نهاية المطاف الجواز بدايه الحياه بس مين يفهم متلاقيش ناس كتير يابنتي اوووووي كملو الجواز عشان معندهمش يبداو حياه من جديد مع اشخاص تانيين وناس مغصوبه ع حياتها هل في زوج فكر كده انت تعبان وهلكان غير نفسيتك بكلمه حلوه لمراتك مهيا بني ادمه هيا لو حست بارتياح نفسي ومعنوي معاك هتفكر معاك وتساعدك وتهون عليك لكن وشك البوز شبرين وسايب البيت قاعد ع القهوه ولا خارج مع اصحابك ولا مسافر متغرب وكل تفكيرك ترملها فلوس ومهمل مشاعرها الزوج هو سبب اساسي بتغير شخصيه الزوجه بعد الجواز بانتظار الزوجه من زوجها كلمات وافعال تسر خاطرها وتقابل بجفا وروتين وده الله بيحولها لمخلوق نكدي قاعدلك ع الوحده

  24. الموضوع بيختلف من بيت للتانى وفي اسباب لا تعد ولا تحصى بتخلى الراجل( ما يقولش كلام حب )😁
    ومش هقولك المشكله بتبقي عندك لوحدك، السبب الطرفين
    لازم اى اتنين مقدمين على الجواز يكون عندهم النيه والقدره على التعايش والتسامح ومايبقاش كل واحد فيهم باصص بس للى هو عايزه وناقصه بعد كده عشان في حاجات كتيير بتتغير مع الوقت والعشره ،لازم الطرفين يكون بينهم صراحه في كل حاجه ويراقبو تصرفاتهم بكل حياديه ،
    ولازم هيدخل الملل لحياتهم ولازم يقاومووه ويتغلبو عليه عشان الحياه تمشي
    الدنيا دار شقاء وابتلاء 😦

  25. Because he catsh his butterfly,😂😗
    ويتغزل بحضرتك ليه بعدها ها فهميني .. 😂😚😚
    ولما يجي حد من برا يتغزل بيها ، تقوم تطير من الفرحه اصلها مسمعتش الكلام دا من حوالي عشرومية سنه 😂😂😂😂😂😂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *