اعرف واحد بيحب واحده اكبر منه ب 10 سنين و هى كمان بتحبه جدا و ياما اتقدملها عرسا…


اعرف واحد بيحب واحده اكبر منه ب 10 سنين و هى كمان بتحبه جدا و ياما اتقدملها عرسان بس هى بتدور على الرجل بجد و هى شايفة فيه الحاجة البتدور عليها و هو برده شايف فيها كل حاجة ناقصاه يعنى من الاخر بيكملو بعض و نفسهم يتجوزو بس المشكلة ان الاهل مش موافقين …. الاتنين دول عاوزين يكسبو بعض و فى نفس الوقت مايخسروش الاهل …. حد عنده حل


Source

25 رأي على “اعرف واحد بيحب واحده اكبر منه ب 10 سنين و هى كمان بتحبه جدا و ياما اتقدملها عرسا…”

  1. بص يا حبيبي قلبي اهم حاجة يكون الإقتناع موجود .. سيبك من هبل الست بتعجز قبل الراجل وخلافه هو الواحد ضمن عمره يعني طالما شايف واحدة مناسبه لتفكيره وهي كمان يبقي السن عمره ما كان عائق بس الأهم يكون شخص رشيد مش ماشي وراء أهوائه أو شهواته أو مراهق لسه ربما يكون طمعان فيها وهي منخدعة فيه .. يكون مقتنع بيها تماماً علشان مستقبلاً ما يقولهاش كلمة توجعها .. زي انتي كنتي لاقية حد ويللا يا بايرة الأهم يكن شخص مقتنع بده ومن أصل طيب وأهله أكيد هيتفهموا طالما شايفها مناسبة وهما المفروض هيعوزوا ايه غير راحته يعني ..

  2. يتمسكوا ببعض و يصبروا عندي صديقة اكبر من جوزها ب ٩ سنين و لما اتجوزوا كانت كمان مطلقة و معاها ولدين وهو مكانش اتجوز اصلاً .. بس هم فضلوا مصممين على بعض لحد ما الاهل اقتنعوا بيها و بأخلاقها و ان اللي حصل لها بيحصل لكتير.. و ممكن يحصل لبنتهم..
    و اتجوزوا و خلفوا ولد و بنت ع الولدين الاولانيين😍 و الحمد لله لسة مع بعض و ربنا مبارك حياتهم

  3. احنا ف مجتمع تفكيره متخلف و معتقداته متعفنة
    انا اعرف ناس بتتلكك علي فرق شهر 😏
    الناس مش قادرة تفهم ان السن ده مجرد ارقام طالما في حب وتفاهم و تفكير متقارب و رضا من الطرفين ليه معقدين الدنيا يابهايم يا بهايم 😅
    يعني ما شاء الله الناس كلها اللي سنها مناسب جوازتها ناجحة ده نصيب و قدر ✋

  4. لو هنحسبها بالعقل يبقي فارق السن كبير اوى وخاصة ان البنت هي الأكبر
    هتتعب بعدين وهتندموا علي الخطوة دى
    اللي قبل الخطوبة والخطوبة شيء والزواج شيء تانى خالص
    راجعو نفسكوا تاني
    ومفيش مانع من خطوبة متقلش عن سنة تقربوا فيها من بعض اكتر وتاخدو قرار صائب
    حاول تقنع الاهل بخطوبة بحجة يتعرف فيها أهلك عليها

  5. اناشايف يكون هدفك واضح وماتخليش حد يقصر عليك لانكما انتو الانتين اللى حتعيشوا مع بعض واهم حاجه التفاهم الاهل مع الوقت حينسوا وان شاء الله تكون حياتكم سعيده حيكونوا هم كمان سعداء وموضوع الانجاب ده رزق من عند الله وموضوع العلاقه الحميمه اهم شى فيها الحاله النفسيه وده حيكون موجود مادام فى تفاهم وربنا يوفقكم وقبل كل ده لازم تصلوا صلاه استخاره

  6. انا شايف ان السن مش مناسب لان الست بتكبر اكتر من الراجل مع مرور الوقت وبعد كده هيدور علي غيرها لمه الجنوط اللي عندها تكرمش من رائي انها تفكو منها وتريحو دمغكم والرجاله والستات علي قفا من يشيل

  7. سيبك من السن سيبك من الام والابن كل ده كلام هبل ولا مكنش الانبياء والرسول اعظم الخلق عمولها سيدنا يوسف عليه السلام تزوج زوليخة كانت أكثر من ضعف عمره والرسول عليه الصلاة والسلام وكثير من الصاحبة تزوجيه عن طيب خاطر

  8. ما انتو اصلااا مجتمع متخلف 😒
    طب ماهو الراجل بيكون اكبر من مراته ب ييجى٢٠ سنه بس ليه هيا بقا مبتمانعش ومش بتقول دا هيكبر ويعجز وانا فى شبابى
    ماهى شاكيرا اتجوزت بيكيه وهيا اكبر منه
    الحب مفيهوش سن 😒😒😒😒
    جهل😒

  9. هو طبعا شاف فيها حضن الام … وهي شافت فيه حضن الطفل صح ؟؟!!
    اقسم بالله عقلكم ده مجاني يعني لو استعملتوه شويه مش هتدفعوا فلوس 😡😡
    ومحدش ينط ويقول اصل الرسول و و
    محدش فينا ربع الرسول ولا حد فيهم خديجه 😐😐

  10. طيب ، ناخد الموضوع نقطه نقطه
    فرق 10سنين فهو فرق معقول جدا ف الارتباط بس لما يبقي هو الكبير
    يعني ولنفترض انو عندو 23 سنه هي هيبقي عندها 33 يعني لو اتجوزت بدري اقسم بالله هتجيب عيل ف سنه ✋
    النقطه التانيه أن علميا الست بتكبر وتعجز وملامحها بتكش قبل الراجل يعني بمجرد مثلا م يجوزوا ويعيشوا تلت اربع سنين طبيعي هتبقي داخله ع الاربعين وسن الياس طب هتخلف امتا وتلحق تربيهم امتا ؟
    النقطه التالته والاخيره التصرفات
    لما هيجي يتصرف بطبيعه سنه هي هتبقي شايفاه لسا صغير وانا عديت باللي انت بتعدي بيه ده
    وكمان التفكير هيسبب مشاكل كتير جدا لانها هتبقي ناضجه اكتر منه وهتبقي هي اللي مشيه الأمور وطبعا هو مش هيسكت أن ست هي اللي تمشي كلامها عليه ✋
    راجع حساباتك يا اخ وماتعافرش ف طريق مسدود وتقول هكمل هتلاقي ف الاول مسكنات هتسكتك ومش بعيد تقويك بس هتقع ف الاخر علي جدور رقبتك … 😊

  11. هوة الموضوع صعب حبتين والاهل عندهم حق الصراحه ، بس معلش عايز اعرف هوة ازاي بقي منهم تعارف وحب مع فرق السن دة يعني مش ممكن تكون زميلته ف الجامعه او حتي صديقه في اي مجال ، ممكن واحتمال ضعيف تكون زميلته ف الشغل وف الحاله دي هوة هيكون عنده 28 سنه وهيه 38 يعني تقريبا الموضوع مستحيل شويه ، انا شايف ان الموضوع غريب ويحتمل الريبه ومعلوماتنا ف الموضوع دة ناقصه ..

  12. …10 سنين فرق مش صغير .. لما انت تكون 30 هي هتكون 40 وهكذا .. هتتحمل ده وتتعايش معاه وتتقبله … يبقي تمام … ربنا يسعدك ويسعدها .. بس القصة مش وقتية فقط .. بص للأمام .. علشان بعد كده مش تقول دا فكرها غير فكري .. وجسمها معرفش حصله ايه .. وكده يعني بحكم السن .. ______ اقتنع اهلك واتمسك بيها لو انت فعلاً تمتلك العقلية .. وليست مجرد مراهقة وهوي ..

  13. في الحجات دي لازم يضحو بحاجه من الاتنين بس انا من وجهة نظري طالما بيحبو بعض وعايزني بعض يبقو يتجوزو والاهل بعد كده هيتصلحو مع الوقت

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *