انا شاب 32 سنة… كنت متعرف على واحدة معايا فى الشغل وحسيت بمشاعر ناحيتها وفاتحت…


انا شاب 32 سنة… كنت متعرف على واحدة معايا فى الشغل وحسيت بمشاعر ناحيتها وفاتحتها ذا كانت توافق نتجوز ولا لا قالتلي بعد ما صلت استخارة انها موافقة وكدة وانا قلت اول ماهنزل اجازة هكلم اهلى فى الموضوع عشان نرتبط المهم حصلت مشاكل من ناحية اهلى وقلتلها وهي اتمسكت بيا .. هى امها ميته وعايشة لوحدها مع ابوها وانا كنت بالنسبة لها كل حاجة فى حياتها .. المهم عدي الوقت والمشاكل من اهلى لسة موجودة فى اخر سنة المشاكل دى اتحلت بس لاقيت نفسي مشاعري ليها قلت ورغم انها كانت فعلا روحها فيا الا اني مكنتش بحس ناحيتها باي حاجة بالعكس مكنتش بطيق اسمع صوت الرسالة اللى جاية منها.. وكانت كل ما اقولها اني هسيبها تنهار وتقعد تعيط وتعمل مشاكل للصبح.. لما نزلت الاجازة دي انا خطبت بنت من بلدنا صغيرة وجميلة غيرها خالص.. وقررت بيني وبين نفسي انى اتوب عن اى غلط عملته قبل كدة وابدا بداية جديدة.. السؤال هنا انا دلوقتي سيبتها وهي محاولتش تكلمني ولا تبعتلي رسايل ولا تعملي مشاكل وعرفت من صاحبتها انها بتتعالج عند دكتور نفسي ونفسيتها تعبانة خالص.. انا مش عايز اشيل ذنبها هل ربنا ممكن يسامحني عليها انا خايف ان ربنا يردلي الوجع اللى وجعتهولها.. انا استغفرت ربنا كتير بس واضح انها هي مسامحتنيش.. تفتكروا ممكن يتردلي دة تانى؟


Source

25 رأي على “انا شاب 32 سنة… كنت متعرف على واحدة معايا فى الشغل وحسيت بمشاعر ناحيتها وفاتحت…”

  1. رد من صاحب الرساله 👇👇

    من فضلك ممكن ترد على الناس تقولهم اني عارف انى غلطان فى حقها وانى انا سبب كسرتها بس انا عايز اغير دة انا دلوقتى بحب خطيبتي وهي بتحبني.. وفى نفس الوقت عايز اريح ضميري ادام ربنا قبل اى حد سؤالى اعمل ايه عشان ربنا يغفرلى.. وبلاش الناس اللى بتدعي عليا انا مش ناقص

  2. اللى انا متاكد منه ان كسر قلوب الاناث لا يمر مرور الكرام اطلاقا..فما بالك بانثى حكم الله على امها ان تكون تحت التراب فكسرت و انت اتممت عليها؟؟!!..فاتورة حضرتك هتسدها فى زوجتك فى بنتك فيك شخصيا ….الاناث غيرنا …يجذبوا من السمع و من معسول كلماتك …افاذا استجبن تغيرت مشاعرنا !!!!…..للاسف الشديد ٣٢ سنه مروا على حضرتك مرور الكرام 😏…فاتورتك ستدفع

  3. اللي لاحظته في جملة “بنت صغيره وجميله غيرها” انك شخص شهواني مُتعفّن ..

    الأمر مش قلة المشاعر نحيتها الأمر متعلق بشهوتك الحيوانية ، هي كانت حلوه بس لاقيت الأحلى.

    عليگ من الله ما تستحق.

  4. انت بني ادم واطي يا اخي حرام عليك لما انت مش هتحافظ عليها بتعشمها ليه هي بنت الناس لعبه ف ايديك مصعبتش عليك ان امها متوفيه ايه ده قلوبكم بقت حجر انت يمكن كنت معجب بيها والاعجاب ده راح بعد ما هي اتعلقت بيك ورايح انت تخطب وتعيش حياتك وهي نفسيتها زفت فين ضميرك لما انت مش قد كلامك بتقوله ليه ع فكره كما تدين تدان و اكيد مش هترتاح ف حياتك قبل ما تكسر قلب حد حبك بجد انظر للخالق لانه مش هيسمحك وبدعوة واحده هتجيبك الارض يا شيخ اتقي الله

  5. الفراغ وحش انا عارف ، خصوصا وأنك مسافر وعايش لوحدك ، بس من مجرب ، هتشوف ايام اسود من ديل الكلب الاسود ، حاول تخليها تسامحك باي شكل ، انا رجعت للصفر بعد ما كنت من هوامير الْقَوْم ، بحسبي الله ونعم الوكيل اللي رددتها عليا في كل صلاة، ايااااك وجرح قلب انثى ، انا تبت الى الله وندمت عل ما فعلت، وراضيتها والحمد لله هيا تزوجت وعايشه بنعيم وانا كذلك ، ربنا يعفو عنا جميعا ويكرمنا …

  6. بخلاف انك خايف يتردلك
    انا بتمنا من ربنا انه يتردلك لانك مش انسان اصلا
    انت مش طبيعي اقسم بالله واللي المفروض يروح عند دكتور نفسي هو انت مش هي
    هي تقعد تصلي وتشكر ربنا انه نجدها من اللي زيك وربنا هيكرمها بحد يعوضها ان شاء الله

  7. أنا مبقدرش ادعي على حد كنت هدعي عليك تدوق كسرة القلب بس مش هدعي وربنا يعوضها باللي احسن منك ويجبر قلبها المكسور أنت في نظري عامل أبشع واشنع جريمة في الوجود وهي انك تكسر قلب حبك وتقسي عليه مش عارفه بتبقي هبل ولا إيه مش عارفين تحددو مشاعركم أمال المراهقين يعمل إيه
    وبلاش تزيد وجعها اكثر وتروح بقا تكتب على الفيس أد إيه انت مبسوط مع خطيبتك وبتحبها وطاير بيها من الفرحه وتحسسها أنها كانت ولا شيء بالنسبة ليك وتقطع قلبها بسكاكين تلمه والنبي كفايه اللي هي فيه بلاش غباء وراعي مشاعرها عشان هتدخل تقرا وتشوف

  8. الناس نازله شتيمه. هوا لما يحصل كده دلوقتى ولا لما تتطلق ويبقى اسمها مطلقه ولا لما يتجوز عليها. هوا انتو ناسيين ان ربنا بيكتب للواحد زوجته وحظه من الدنيا. دا خلاص بقي امر واقع. هيعمل ايه دلوقت. هيسيب خطيبته ويكسرها ويكسر قلبه ولا يتجوز الاتنين. وبعدين مهيا كمان لو نزلت المشكله هتقوليلها انك عملتى حاجه غلط بارتباط غير رسمى. خلاص ياعم هوا نصيبها كده وقدرها. مفيش حاجه هتتغير. كمل حياتك واستغفر ربنا لانك كنت ناوى خير. لكن لطبيعى انه بيحصل فتور فى العلاقات البدايه اعجاب شديد ولنهايه كده. حتى بعد الجواز هتلاقى الفتور ده مع مراتك. بطلو هبد بقى وانت ياعم ابعد عنها وكمل حياتك. وادعيلها

  9. واضح انك عندك فراغ …بمعنى اصح كل ما واحد تعجبك …تقول بحبها ..بس من الاخر يابرنس طالما عشمتها وخليت بيها …ده انت هتلاقى كوارث ومصايب ف حياتك متعرفش جايه من انهى اتجاه يلا ربنا يقويك ع ال جى ياديل الكلب انت

  10. منك لله ي بعيد
    ربنا مش هيسيب ابدا عشان تعشم يتيمه فيك وتكسر قلبها ومستغرب انها مبعتتش رساله دا انت مفيش دم خالص
    بس ربنا هيدوقك كسره قلبها ان شاء الله
    وربنا يعوضها بالى يداوى كسرها ويعوضها خير عن اشباه الرجال

  11. ان شاء الله طبعآ هيتردلك ياوجع قلبك دلوقتي واللهي طلعتني عن شعوري ياشيخ دا بيقولك فاما اليتيم فلا تقهر وانت اللي بدات العلاقه في الاول اسفه معنديش كلام تريح بيه ضميرك اناهسيبك لضميرك واسال نفسك ده حرام ولاحلال

  12. لازم هي نفسها تسامحك …بس الي بتوجع حد بيتوجع والبنت الي فضلتها عليها هي الي تاخد حقها منك…حق ربنا ربنا بيسامح فيه انما حق العباد لازم هما الي يسامحوك…وحسبي الله ونعم الوكيل فيك وفي الي بيعمل زيك وشبهك …جاتكم ستين نيله مليتوا البلد

  13. . انا كبنت عادي خالص يعني ياخذها غصب عنه عشان حرام مش حرام خالص ما ياما كتير اعجبو ببعض والنصيب فرقهم وكانت عجباه وخلاص راح الإعجاب هيقطع نفسه ما كل واحد بيفكر عاوز ايه هي كمان تدور على حد غيره ما كانت عايشه لوحدها عمر السعاده ما كانت مرتبطه بشخص هو مفيش غيره في غيره وأحسن بكتير تدور على نصيبها وهو جرحها ولا كسرها مش بإرادته هو كمان غصب عنه مش كل واحد لازم يعرف هو حاسس بايه وشريكته حياته وعمره قابلها ولا لا وبعدين هو زعلان يغني غصب عنه مرحش اتسلا بيها ولا غرضه يوصل لحاجه معينه ووصلها وسابها لا دا كان معجب بيها والإعجاب راح خلاص مش كلنا ملابكه كلنا خطاءين وكلنا بنجرح بعض عمدا

  14. افضل شىء انك تدعيلها ربنا يوفقها ويفرحها زى ما فرحك وانت غصب عنك القلوب بيد خالقها ولو كان فيه خير ليكم كان الف الله بينكم للنهاية لكن اكيد الخير هو اللى حصل ليك وليها وانت مش اول واحد ولا اخر واحد يحصل معاه كده وكفاية انك عارف غلطك بس الواجب عليك تدعيلها ودع الملك للمالك وانت لست احن عليها من خالقها

  15. يا ابن آدم افعل ما شئت فكما تدين تدان
    اوعي تفتكر كل اللي اللي بيحصلها او حصلها بسببك مش هيتردلك أضعاف مضاعفه انتا عشمتها من البدايه وللاسف مكنتش اد الوعد ومش بس كدا لا انتا كمان ندل بأمتياز ومع مرتبة الشرف انتظر عقاب الله لك في قبل الاخره ولا يظلم ربك احدا

  16. حسبي الله ونعم الوكيل فيك وفي كل واحد بيلعب بمشاعر بنت هيتردلك ف اختك او بنتك كفايه حجج فارغه فعلا الرجوله مش بالشنب ف بنات ارجل منكم حسبي الله ونعم الوكيل ربنا مبيظلمش حد وهتشوف انت وكل واحد عشم بنت واتحجج مش راجل ومش قد كلمتك كنت بتقولها ليه

  17. حاول تكفر عن ذنبك موش عاوزة اخوفك بس كان فية واحدة صحبتي اتعمل فيها كدا برضو وسابها خطيبها من غير اي سبب واتدمرت وخطب غيرها فدعت علية امها بعدم الخلفة طول الحياة وقد كان فربنا يكفيك شر دعوة المظلوم

  18. يا رب اللهم عليك بمن ظلمني اللهم اسقم جسده، وانقص أجله، وخيّب أمله، وأزل ظلمه، واجعل شغله في بدنه، ولا تفكّه من حزنه، وصيّر كيده في ضلال، وأمره إلى زوال، ونعمته إلى انتقال، وجدّه في سفال، وسلطانه في اضمحلال، وعافيته إلى شر مآل، وأمِتْه بغيظه إذا أمتّه، وأبقه لحزنه إن أبقيته، وقني شرّه وهمزه ولمزه، وسطوته وعداوته، فإنّك أشدّ بأساً وأشدّ تنكيلاً.

  19. انت واللي زيك من اشباه الرجاله ربنا هيكسر قلبك اصلها دايره وبتدور روح هتدوق من نفس الوجع والحلوه الصغيره دي بكره تتفرج هتعمل فيك ايه اصل ذنب ناس بتخلصه ناس

  20. انتا ليه كدة .انا مش عارفة اقولك ايه بصراحة ليه علقتها بيك ذنبها يعنى انها حبيتك وشافت فيك زوج صالح ليها مش معقولة كدة هيا لعبة فى ايدك والغريبة انك مستغرب من رد فعلها ايه ده
    بس الحمد لله فعلا ان ربنا انقذها منك لان اكيد ربنا هيكرمها بأفضل منك ربنا يكرمها بشخص إيجابى ومتقلقش كله سلف ودين . كله بيترد وربنا هياخدلها حقها بس مبرووووك عليك عروستك الجميلة الصغيرة إل بردوا هتتنازل عنها اكيد لانك موضوع عادى بالنسبالك بتحب التغيييييير والانانية

  21. لو كانت هي الي سابتك واتوجعت كنت هتفضل طول العمر تجري وراها بس المشكله في كائن الرجال انهم يميلون لمن تنفر منهم ويبتعدون عن من تعشقهم …الاكيد انك هتدوق من نفس الكأس

  22. بنت صغيرة وجميلة غيرها يبقا انت بتاع الشهوة واللى حبيتك دى ودمرتها ربنا يدمرلك حياتك بس مش دلوقتى لا بالعكس اما تتنبنا وتبقا كبيرة هتقع على جظور رقبتك

  23. الموضوع انك كان عندك فراغ عاطفى عشان سنك لاكن لما لقيت الاحلى منها سيبتها انتا كده دمرتها نفسيا. ملكش حل غير انك ترجع علاقتك بيها او تتطلب من ربنا يسمحك

  24. روح ربنا يهدك الاشكال الواطية اللي زيك المفروض نجمعهم ف مقلب زباله و نولع فيهم بجاز وسخ ان شاء الله مش هتشوف خير في حياتك ويارب يارب ع قد الوجع اللي ف قلب البنت دي ربنا يبعتلك اضعافه و هي ربنا يعوضها ب رااااااااااااااجل ينسيها 😡

  25. ربنا يهديك يااااارب
    بس بنات الناس مش لعبة..✋
    اللي حصل حصل للاسف انت كسرتها وكسرت فرحتها ،،
    ومش هينفع ترجعلها لانك هتكسر قلب بنت تانية اللي هي خطيبتك😒
    كل اللي هقولهولك المفروض بقى بعد كل دا تتعلم من غلطك ..
    يعني متجيش بعد كام يوم وتقول انا مبقتش حاسس اني بحب خطيبتي وتروح لواحدة تانية 😏
    غير من نفسك وغير من حياتك
    وكويس انك حاسس بتانيب ضمير
    😑
    والبنت اللي كسرت قلبها ليها رب هيتولاها وربنا يرزقها بالزوج الصالح اللي ينسيها كل اللي حصلها في حياتها ..😥
    ويفرح قلبها ويسعدها اللهم آمين
    وانت استغفر ربنا وتوب اليه
    وادعيلها
    وأفضل حل ليك انك تتعلم من تخطائك ومتكررهاش تااااااني
    كلنا بنغلط✋واحنا بشر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *